Mens, vir wat blog jy?

Toe ek op begin blog het, het ek besef hierdie is ekstra werk. ‘n Paar vrae het in my kop rond gespeel. Het ek regtig die tyd? Wil ek regtig, ‘n stukkie van my siel, aan die wêreld ontbloot? Sien ek regtig kans, om aangevat te word, as ek sterk voel, oor my beginsels en standpunte? Nadat ek dit lank oordink het, het ek besluit ja, ek wil my woorde met ander deel.

My eerste blog het ek op “blogspot” oopgemaak, dit is net ‘n blog van my huis, kinders en tuin, ons vriende wat vêr van mekaar is (oor die wêreld versprei), deel op hierdie manier, ons lewe met mekaar. Ek pos net so dan en wan ietsie daar, geen harde werk. My blog op “wordpress” , nou hierdie is ‘n blog van ‘n heeltemal ander aard, hierdie meneer soek aandag, ek moet hom die heeltyd voer met woorde. My vriendinne bel ook baie gou om te hoor wanneer maak ek dan nou ‘n nuwe inskrywing – dit wil my voorkom, dis die nuwe manier hoe hulle kontak met my hou? Dis onregverdig want dis mos nou eensydig. (lag ek nou skelm vir hulle)

Vir my is woorde, soos note vir ‘n musikant is. Dit is ‘n manier om myself uit te druk, op ‘n kreatiewe wyse. In die begin was dit vir my moeilik om my gedagtes, en woorde, hier vir die wye wêreld te publiseer. Later het dit makliker geword.

Soos ek tussen ander blogs rond loer, sien ek dat elkeen se blog vir hom ‘n doel dien. Party gesels oor hulle daaglikse lewe, ander gesels oor blomme, gedigte en hul hartseer of gelukkige ervarings. Maar maak nie saak waaroor iemand skryf nie jy leer iemand ken, hulle gedagtes, frustrasies en gevoelens oor baie dinge. Blogs loer, laat jou lag en huil, leer jou hoe ander mense se koppe werk. Jy sien so stukkie van ander se lewenservaringe en denkwyses.

So wat doen blogging vir my. Dis ‘n manier om van my frustrasies ontslae te raak, ek gesels lekker met myself en ander. En natuurlik is dit ook ‘n maklike, en veilige manier om nuwe vriende te maak. Daar gaan nie ‘n dag verby dat sommige inskrywings my nie laat skater van die lag nie! Daar is soveel verskillende persoonlikhede, jy sal nooit verveeld raak. My grootste rede natuurlik is, dat daar baie ouliker mense in hierdie wêreld is, as daar buite in die “real world”

Hoekom blog jy?

“I am aware that I am less than some people prefer me to be. But most people are unaware that I am so much more than what they see.” Douglas Pagels