‘n Moer storie …..!

“Rooi baadjie”

Wipneus het vertroebelde bloed.  Ja glo dit maar, my oupa aan vaderskant was rou Brit, wat teen die Afrikaners kom oorlog maak het!   Hy het nooit terug gegaan Brittanje toe nie.  Hy het sy vrou en 2 seuns hier na SA toe laat kom.  My Dad het egter later terug gekeer na  Brittanje om te gaan studeer.

My “Dad” het my vertel my oupa was ‘n vreeslike man.  Baie beduiweld en altyd paraat, reg vir oorlog!!    Hy het byvoorbeeld ‘n sekere plek vir hom afgebaken,  lank na die oorlog,  en niemand mag voet daar gesit het nie.  Hy het met sy oorlogsvoering daar rond gemasjeer in sy koninkryk!!

Jan Smuts se goedjies

My oupa aan moederskant was weer stoere boer, en het pen orent gespring as hy die naam Jan Smuts hoor.  Groot liefde gehad vir die man.  Geen hertzog koekies was is in ons huis toegelaat nie.  Dit moet Jan Smuts koekies wees.

Ek onthou in die gang het daar prent gehang van Strijdom en ‘n Potret so blink foelie affêre van die monument.  Daarop het gestaan:   Ons vir jou Suid Afrika….

So terug van Brittanje ontmoet my Dad my ma, Rou brit en Rou Afrikaner vry nou in “Fanagalo”  Hoe vry mens as jy mekaar nie verstaan nie?  Dit was ‘n gevry in brabbel taal.

My ma op haar troudag

Die dat ek vandag nog nie weet aan watter kant van die draad ek moet wei nie….

Ek is soos ‘n bok wat verlore geraak het!

Paul Kruger se goedjies

Om alles nou nog verder te vererger, trou Wipneus met Teddie wat ‘n goeie sterk Afrikaanse bloedlyn het.  Hy is direkte afstammeling van Paul Kruger se vrou.  My ma sê dis hoekom alles so mal gaan in hierdie huis

Ons vry nou wel nie in “fanagalo” nie, maar soms praat ons oor en deurmekaar.  Ons kinders het ook andersoortige maniere…..  Met ander woorde hulle het ook hierdie “moer” streep weg.

Ek was bv nie geleer om Tannie en Oom te sê nie, en wou my doodlag as Teddie aandring dat ons kinders ander mense moet Oom en Tannie wat nie ons bloed deel nie!!!  Hy het naderhand moed opgegee, kon dit seker nie hou met die vrou wat histeries en dubbelgevou aan die lag gaan oor die vreemde ding wat hy ons kinders wil leer nie…..

Die ander ding is Pap, ek het my doodgeskrik toe ek sien my geliefde se ouers gee vir hulle ontbyt vir aand-ete.  Ek het daardie aand vir my ma gesê die mense moet seker vreeslik arm wees.

My en Teddie se begin jare was dus die oorlog van vooraf!!!  Ons moes skaaf en baklei om mekaar te verstaan….. Dit was ‘n totaal moer storie…. amper soos potjiekos… alles ‘n deurmekaar gemoerery …..

Dus volgende keer as julle sien ek is besig om dit te verloor, betoon simpatie….. want ek sien myself net soos my Rooibaadjie Oupa agter die kanon….

Moet dus ook nie verder wonder hoekom ek so groot liefde het vir kanonne nie……

Klop net aan my blog se deur as julle van my dienste wil gebruik maak.

Met my R4 oor my skouer is ek gevaarlik!!  Ek is altyd besig met die een of ander oorlog …..

Onthou net die password is:

ROOIBAADJIE

~~~~

Fotos geneem by die oorlogsmuseum in Johannesburg – Canon 40D

Hierdie inskrywing is opgedra aan my moeder, wat gister verduidelik het hoekom Wipneus soms ‘n gruwelike humeur ontwikkel    he he